Cabozo blog

(…)

Dende FEGEREC (Federación Galega de Enfermidades Raras e Crónicas) puxéronse en contacto con Cabozo para que axudemos a difundir esta acción solidaria.

Con motivo da próxima maratón Coruña 42, o 15 de abril, puxemos en marcha un proxecto de crowdfunding para conseguir fondos para FEGEREC na páxina migranodearena.org.

(…)

Dende hai tempo, os usuari@s desta rede social poden compartir o que publican en Cabozo tamén noutras webs para axudar á difusión deses contidos. Para iso facilítanse ligazóns permanentes externas (enlaces) aos seus contidos, tanto nos grupos como nos taboleiros. Por exemplo, podes subir unha mensaxe cun vídeo de YouTube para que o vexan os teus seguidores de Cabozo e logo enlazar a esa mensaxe en Cabozo dende a túa conta de Twitter para que tamén o vexan os teus seguidores alí.

Pois ben, agora calquera pode deixar comentarios a eses contidos públicos aínda que non estea rexistrado en Cabozo

É un servizo que non adoita ser habitual nas redes sociais, e veremos que tal funciona, pero mentres se faga un bo uso do mesmo aí está para que cada vez máis xente poida participar e interactuar cos contidos e usuari@s de Cabozo.

Podedes picar aquí para probar esta nova opción e de paso comentádesnos que vos parece

(Lectores no gallegos pinchad aquí)

A miúdo escóitase falar de novos proxectos online que se poñen a andar e tamén, ás veces, do diñeiro que hai detrás deles, ás veces centos de miles de euros os cales tamén ás veces saen do noso peto (leáse impostos). Falamos de proxectos pequenos ou medianos que non precisan dun centro de datos como os de Google, Facebook and Co., nin dun cento de enxeñeiros. Falamos de proxectos que en moitas ocasións están feitos sobre plataformas xa existentes o que supón que a metade do traballo xa está feito. Falamos de proxectos nos que ás veces detrás deles xa hai programadores. Falamos de proxectos que ao final non teñen moito máis tráfico que Cabozo ou que simplemente teñen menos.

Para o profano na materia que unha web ‘custe’ centos de miles de euros pódelle resultar do máis normal porque o que lle soa deste mundillo normalmente son as grandes webs como Google, Facebook e compañía, e a miúdo Internet enténdese como sinónimo unicamente destes xigantes que navegan nun mar de millóns de euros.

Para o que sabe un pouquiño deste tema, e máis aínda para o que xa ten un proxecto web funcionando dende hai tempo, que unha web do tipo que comentamos no primeiro parágrafo custe ou precise de centos de miles de euros é unha tomadura de pelo.

Xa non é o primeiro que se asombra de que nós mesmos asumamos todos os custos de Cabozo… Como se pode manter Cabozo se non teñen nin publicidade, nin sponsors, nin ningún outro tipo de ingresos? Sonche millonarios? A última pregunta xa cha escoitamos algunha vez, e vindo ás veces estas preguntas de xente que se supón que saben do tema éche un pouco desconcertante a cousa.

En Cabozo somos dous. A programación lévoa eu e a parte de difusión, social media… entre outras cousas, lévacha o meu compañeiro. Os custos asumímolos as dúas personas que estamos detrás. Estamos tolos? Bo, un pouco si, pero non tanto como parece

Os únicos custos que ten Cabozo son os de aloxamento e nome de dominio. Cabozo furrula cun servidor cuns recursos de hardware menores a moitos dos teléfonos móbiles que levades no peto. Funciona, e polo momento moi ben.

No caso de que se precisasen máis recursos iso tamén significaría que a web ten moito máis tráfico/visitas (caralludo ) e poderíase estudar a forma de conseguir algún cartiño para axudar a sufragar estes custos.

Cabozo esta aloxado en hostgator.com, unha compañia americana. E por que non unha galega? Pois ben, como o pagamos do noso peto, e a pela é a pela, haiche que mirar da empresa que ofreza a mellor relación calidade/prestacións/prezo e Hostgator ofrece unha relación moi boa. Se algunha empresa galega pódenos ofrecer o mesmo polo mesmo prezo ou melloralo, cambiariamos con moito gusto

Ao principio pagábase por Cabozo uns 5 dólares ao mes Debido ao incremento do tráfico e dos requirimentos de procesamento, cambiámonos a outro plan que custa ao mes ao redor de 40 dólares. Con este novo plan, dende que se contratou, non che houbo ningún tipo de problema de funcionamento/rendemento. Como se pode ver os custos non che son moi elevados.

Todo este ‘rollo’ vén por dous motivos. Primeiro, moitas veces unha web non necesita ou non debera necesitar para o seu desenvolvemento tantos cartos como din precisar, sobre todo cando eses cartos van saír do noso peto (léase subvencións).  Montar unha pequena tenda online ou modificar un pouco Drupal non pode custar centos de miles de euros. E segundo, calquera cuns coñecementos medios de programación web pode montar o seu proxecto online cuns custos moi baixos, pois se está aforrando os custos de programación/desenvolvemento e unicamente tense que preocupar do hosting.

Anímovos a todos os que teñades unha idea de proxecto online a botarvos adiante e levala a cabo. Se te encargas ti mesmo da programación, como podes ver, os custos serán realmente baixos. Ademais, sempre acabarás aprendendo moitas cousas novas, colleras experiencia, pasaralo ben e ás veces, coñecerás xente caralluda. E non pasa nada se ese proxecto non vai como esperabas, sempre se pode volver tentar con outra idea xenial na que aplicarás todo o aprendido coa anterior.

Saúdos!!

Deckarz

Antonio Mariño y Ángel Folgueira, autores de Cabozo.com

Galicia Confidencial, xornal online líder en galego, entrevista a Antonio Mariño e Ángel Folgueira, creadores de Cabozo, cos que fai un repaso do pasado, presente e futuro desta rede social “made in Galicia”

Pica aquí para ler a entrevista:

- Entrevista orixinal en galego en Galicia Confidencial

- Versión en castellano de la entrevista para nuestros seguidores de fuera de Galicia

Dende hai un tempo moitos cabozeir@s véñennos comentando que non poden acceder a Cabozo dende os seus PCs cando están conectados á rede da USC.

Hoxe puiden facer unha proba xunto a Eugznomeular, cabozeira e estudante da USC (graciñas de novo ) e isto é o que vos podo contar:

O problema está en que o servidor de DNS da USC non sabe resolver o nome de Cabozo.com, é dicir, non sabe cal é a súa dirección IP correspondente.

O tema funciona da seguinte maneira:

- PC Usuari@: Moi boas, podería por favor facilitarme a dirección (IP) da web Cabozo.com

- PC USC: Moi boas, si un momentiño que busco na miña axenda a súa dirección (IP)… vaia, semella que na axenda non teño anotada a dirección para Cabozo.com. Síntocho moito.

- PC Usuari@: Vaia ho!, tiña que comentarlle unha cousiña a Deckarz…

- PC USC: Bueno, se queres pódoche dar sen problema a do Facebook.com ou a de Twitter.com

Como PC USC non sabe cal é a dirección de Cabozo cando se lle pregunta por ela, ímoslle dicir nós ao noso computador que dirección ten Cabozo e así non lle fará falta preguntarlle o PC USC

Para iso imos editar o arquivo “hosts” que é unha axenda parecida á do PC USC onde se atopan os nomes de dominio e direccións IP. Dependendo do sistema operativo que esteas a utilizar, esta é a súa localización:

Windows 95/98/Me —>  C:\Windows\hosts

Windows NT/2000 —>   C:\WINNT\System32\drivers\etc\hosts

Windows XP/2003/Vista/7 —>   C:\Windows\System32\drivers\etc\hosts

Mac OS/iPhone OS  —>  /private/etc/hosts

Unix/Linux/BSD —>    /etc/hosts

Abrimos o arquivo cun editor de texto (en Windows co Bloc de notas) e debaixo de todo engadimos a seguinte liña:

174.122.126.101 www.cabozo.com cabozo.com

Gardamos e reiniciamos o PC.

Unha vez arrancado de novo o noso PC, poñemos no navegador www.cabozo.com e a páxina estará accesible sen ningún problema.

Non o puiden probar, pero probablemente con isto se solucione o problema. Se non é así por favor comentarmo!

Saúdos!

Deckarz

Actualización (24.02): Algúns usuarios xa puideron conectarse á rede da USC sen necesidade de aplicar esta solución . Non sabemos se a xente da USC solucionou o problema (non recibimos información ao respecto pero se é así agradecémosllelo aos responsables do servizo) ou se é un problema intermitente.

Se nalgún caso seguides tendo problemas para acceder non dubidedes en probar a solución proposta.

(Opción non activada)

Debido ao peche de varios medios online galegos nos últimos tempos e á recente aparición de novas cabeceiras como Praza.com, vímonos obrigados a darlle un repaso á lista de xornais que aparecen nas ‘Novas’ de Cabozo.

Aproveitamos así, ademais de para ampliar a lista de medios que aparecen nesta sección, para dotar de máis funcionalidades a esta ferramenta de Cabozo podendo seguir tamén agora Twitter e Flickr Galicia (ademais de versións non galegas), Google Galicia e Google Destacadas, etc.

A sección Novas, que se integra como unha das 5 pestanas do noso taboleiro, recolle automaticamente as noticias de portada de distintos medios online galegos e de fóra de Galicia.

Algúns medios galegos que podemos seguir en Novas son Galicia Confidencial, o medio xeralista en galego máis lido na Rede, Código Cero, Galiciae, Faro de Vigo, Praza… Tamén podemos seguir medios de fóra de Galicia como El País, Público, El Mundo, Menéame, Muy Interesante, Gizmodo…

Algunhas opcións que ofrece esta ferramenta de Cabozo son:

• Picando sobre os titulares das noticias podemos ler o seu contido na fonte orixinal
• Se picamos sobre o “Máis“ que aparece á dereita dos titulares temos as seguintes opcións:

- NOVIDADE!!! Ver o que se comenta sobre esa noticia en Twitter picando sobre a nova icona Twitter (ver imaxe superior)

- Ver a mesma noticia noutros medios para ter unha visión máis ampla desta

- Enviar a noticia directamente ao noso taboleiro recibindo todos os nosos seguidores un aviso de actualización

- Compartir a noticia directamente noutras plataformas como Twitter, Facebook…

(Contacta con Cabozo se queres incluír un novo medio a esta sección)

(Opción non activada)

Aos usuarios que chegan a Cabozo con certas inquietudes políticas pódeselles ocorrer a seguinte pregunta…

Hai en Cabozo representación da política galega? A resposta é…

Si, pero moi escasa e intermitente

Actualmente esta é a representación política que podes atopar en Cabozo (pica sobre os nomes para acceder á versión pública dos seus taboleiros):

- pachivazquez: A conta de Pachi Vázquez, Secretario Xeral do Partido dos Socialistas de Galicia-PSOE, foi a primeira conta de cariz político creada en Cabozo. Ademais é o único representante dalgunha das principais forzas políticas galegas con presenza na rede social galega.

Dende o 14 de febreiro de 2011, data da súa creación, é unha conta bastante activa e actualizada con regularidade, se ben é certo que dende o pasado mes de decembro non recibe ningunha actualización. Esperemos que sexa só un parón puntual da conta que abriu o camiño á presenza en Cabozo da representación política.

- sxpl: A conta da Secretaría Xeral de Política Lingüística da Xunta de Galicia foi a segunda conta de cariz político cunha actividade regular en Cabozo. Dende o 28 de febreiro de 2011, data da súa apertura, recibe actualizacións practicamente diarias.

- ppdegalicia: O PP de Galicia é o primeiro partido político con representación oficial en Cabozo. Dende o 28 de setembro de 2011, data na que foi creada, é unha conta bastante dinámica salvo algún parón puntual na súa actividade.

E a data de hoxe, esta é a única representación da política galega en Cabozo, resultándonos sorprendentes certas ausencias sendo esta unha web galega, creada por galegos, redactada integramente en galego, plural e independente… ou será precisamente isto último o que motiva determinadas ausencias? Quen sabe…

Fronte a esta representación oficial, tamén podemos atopar algún usuario que fai o posible por dar visibilidade á súa organización en ausencia dunha presenza oficial da mesma en Cabozo.

- OnL: Este taboleiro do responsábel local do BNG de Oroso, ademais de membro dá Executiva Nacional de CIG Ensino pode ser unha alternativa para os que queiran estar informados sobre a actualidade do nacionalismo galego dende Cabozo.

E isto é todo. Iranse sumando pouco a pouco novas caras e partidos? Esperemos

ACTUALIZACIÓN

Pois si, parece que se van sumando novas opcións políticas a Cabozo…

- obloque: Dende o pasado 23 de febreiro os seguidores ou aqueles que teñan curiosidade por coñecer a actualidade do BNG xa o poden facer en Cabozo a través desta conta con actualizacións case a diario.

(opción non activada)

Non están todos os que son nin son todos os que están pero poden servir de guía para quen acabe de aterrar en Cabozo. Logo, como todo, para gustos hai cores

Esta recompilación pretende ser unha pequena mostra dalgúns dos contidos que día a día se comparten nos taboleiros de Cabozo. As contas seleccionadas non se corresponden necesariamente cos usuarios máis activos da rede (que podedes coñecer no Ranking de Cabozo) xa que moitos usuarios prefiren participar máis activamente noutras seccións de Cabozo como as Cabozadas ou Grupos. Picando sobre os nomes dos usuarios podes acceder á versión pública dos seus taboleiros (Para ver a versión completa tes que ter conta en Cabozo)

Empezamos coas contas dos dous desenvolvedores de Cabozo. Recomendamos seguilos porque naide mellor que eles para botarvos unha man chegado o caso:

- LegnaLof: Ademais de información sobre Cabozo, adoita compartir bastante información sobre actualidade, redes sociais, recursos humanos, tecnoloxía, social media…

- Deckarz: (Actualmente ten a súa conta restrinxida exclusivamente a usuarios rexistrados en Cabozo). Aínda que ultimamente non adoita ter moito tempo para compartir contidos en Cabozo debido á súa recente paternidade, de cando en vez déixanos, ademais de información sobre Cabozo, algunha pincelada sobre a súa estancia en Alemaña onde reside desde hai uns anos…

Esta é outra conta interesante do equipo de Cabozo que tamén deberiades seguir:

- AchegasCabozo: Toda a información oficial sobre Cabozo publicase neste taboleiro. Ademais, case a diario, recolle unha mostra dalgúns dos contidos máis interesantes que se van publicando en Cabozo polo que tamén nos servirá para coñecer novos usuarios. Seguimos con máis taboleiros interesantes:

- Gconfidencial (Galicia Confidencial): Toda a actualidade de Galicia no xornal en galego líder en Internet. Como Cabozo é un proxecto totalmente independente e foi o primeiro medio galego en apostar por esta rede social

- aMonaAzul: Probablemente o taboleiro máis canalla e un dos máis divertidos de Cabozo. Para moitos o taboleiro máis quente, sen chegar a queimar, da rede galega

- davidfdva: O taboleiro deste “Historiador con vocación prehistoriadora” afincado en Tarragona é un dos máis interesantes de Cabozo podendo atopar nel contidos curiosos e de actualidade moi ligados á cultura e realidade galega.

- Breogahn: Como deixa entrever a súa Bio “De cativo, un día que non paraba de chorrar, meu avó mollóume o chupete na queimada. Uns anos máis tarde ocorréume o mesmo ca Obélix pero na pota de face-la caña” esta conta é un claro expoñente da retranca galega Podedes atopar contidos moi variados, dende información sobre Android ata curiosidades da zona do Barbanza. Por certo, ¡un consello! Se non tedes nada para comer a man e tedes moita fame… non se vos ocorra entrar a ver os seus álbums de fotos ou pasaredes moooita fame (envexa)!

- carloscaneda: Un dos usuarios con máis antigüidade de Cabozo e que dende Vilalonga, parroquia de Sanxenxo, nos trae música de todo tipo. Aínda que ultimamente non se pasa moito porque anda un pouco liado (nunca mellor dito e… ata aquí podo contar) é deses usuarios que convén seguir.

- ramondavella: Conta que dende Fisterra nos trae, practicamente a diario, reflexións enxeñosas sobre a vida.

- trisquel: No taboleiro deste “Ciclista frustrado con alguns coñecementos de informática” podes atopar bastante información relacionada con internet e o software libre ademais de curiosidades variadas.

- casauma: Na conta de “Casa Uma“, fermosa casa de turismo no rural das Rías Baixas, poderás atopar moita información sobre natureza e ecoloxía galega, entre outras cousas.

- begomtez: Practica inglés sen saír de Cabozo

- Gamela: Seguindo a este profesor de Vigo seguiremos un dos taboleiros máis críticos e reivindicativos de Cabozo.

- abel: Se vos gusta viaxar ou coñecer novos lugares sen movervos da casa non deixedes de seguir o taboleiro deste profesor de Compostela “apaixonado da natureza, o mundo do motor, as viaxes, a metereoloxía e os bares” Aínda que non adoita pasar con asiduidade, cando o fai comparte espectaculares xoias en forma de reportaxes das súas viaxes por todo o mundo.

- GalegoLab: Neste taboleiro podes seguir as iniciativas promovidas por GalegoLab, dar ideas, botar unha man e colaborar en accións a prol do galego

- alugris: Interesante taboleiro dende Vigo con contidos variados.

- diadenos: A pesar de ser dos últimos usuarios en chegar, fano con forza dende Ourense Entre as primeiras achegas compartidas neste taboleiro atopamos contidos que recuperan parte da memoria audiovisual da cultura galega.

- Galiloxia: A tecnoloxía en galego. Taboleiro onde podes atopar todo tipo de curiosidades sobre a ciencia, a tecnoloxía, e todo canto aparello imaxines

- AnaGazza: Dende Pontevedra chéganos este taboleiro que poderiamos definir como unha recompilación de curiosidades da Rede

- monteuve: Interesante taboleiro no que, entre outras cousas, podemos ver fragmentos audiovisuais de grandes clásicos do cine internacional. Obrigatorio para os amantes do bo cine.

Para aqueles que esteades interesados en seguir a política galega recomendámosvos ler o seguinte post onde podedes ver as distintas opcións que tedes en Cabozo:

- A representación da política galega en Cabozo

A principios de 2008 empezáronse a compartir as primeiras mensaxes nunha pequena web galega creada por aquel entón sen maiores pretensións que servir de canle de comunicación dun reducido grupo de colegas de Viveiro.

Un ano máis tarde dábase o pistoletazo de saída á aventura cabozeira na rede galega.

Hoxe, 14 de febreiro de 2012, Cabozo celebra o seu 4º aniversario agradecendo o apoio dunha cada día maior comunidade de usuarios.

GRACIÑAS!!!

Deckarz e LegnaLof