Cabozo blog

(Lectores no gallegos pinchad aquí)

O primeiro que debemos ter claro é que aínda que en Cabozo existen distintos espazos onde publicar contidos, debe ser o noso Muro ou Taboleiro o espazo principal para publicar e compartir contidos co resto de usuarios, reservando outros espazos como as Cabozadas ou os Grupos para darnos a coñecer e intentar captar a atención doutros usuarios para que nos sigan.

Quen pode ver o meu Taboleiro? Que sucede cando creo contido no meu Taboleiro?

Aínda que en principio calquera usuario rexistrado en Cabozo pode chegar ata o noso Taboleiro e ver os contidos que publicamos, só aqueles usuarios que nos seguen reciben avisos automáticos das nosas actualizacións cando creamos contidos no noso muro (nas súas pestana “Lox“), de aí a importancia de ter o maior número posible de seguidores . A maior número de seguidores maiores posibilidades de difusión terán as nosas publicacións. A nosa verdadeira audiencia en Cabozo son os nosos seguidores.

Quen pode publicar no meu Taboleiro?

En Cabozo calquera usuario pode publicar no noso Taboleiro. Iso si, ti terás a última palabra, xa que en calquera momento podes eliminar aquilo que non queiras que apareza no teu Taboleiro. Aínda así, antes de eliminar contidos alleos do teu Taboleiro valora ben a devandita opción xa que pode non sentar ben a quen o publicou. Outra cousa que debemos ter en conta é que en Cabozo non podemos bloquear ningún usuario, aínda que si eliminalo da nosa lista de seguidores e con iso evitar que reciba os avisos automáticos das nosas actualizacións.

Tendo todo isto claro, que podemos facer entón para lograr máis visitas ao noso Taboleiro e polo tanto que as nosas publicacións teñan maior difusión? Ben, eu aconsellaríavos seguir as seguintes recomendacións:

1.- Crea contido de calidade. En función da audiencia que queiras captar ninguén mellor ca ti saberá cales son os temas que poden xerar maior interese. Dentro deses temas, canto máis novidosas, actuais ou interesantes sexan as túas publicacións máis interese suscitarán.

2.- Procura que os contidos que publiques sexan o máis vistosos posibles. En Cabozo podes achegar ao mesmo tempo unha imaxe (jpeg) e un vídeo de Youtube (que se publicará para visualizar directamente) aos textos e enlaces que vaias publicar. Temos máis que comprobado que teñen moitas máis visitas as publicacións que achegan algún elemento visual (foto/vídeo) que as que non.

3.- Faite visible na web. De nada valerá que teñas os contidos máis vistosos e de maior calidade se ninguén sabe que existen. Aquí podes ler 8 pasos a seguir para deixar de ser invisible en Cabozo.

4.- Aproveita as posibilidades de difusión que che ofrecen os Grupos/foros de Cabozo. Existen xa máis de 120 grupos públicos de diversas temáticas. Participa naqueles cuxa temática se axuste mellor coa audiencia que queres conseguir. Publica tamén alí contidos, comenta os xa existentes e de cando en vez, aínda que non debes abusar desa posibilidade, publica “mensaxes gancho” para atraer usuarios ao teu Taboleiro do tipo “primeiras imaxes da próxima película de Steven Spielberg. Vídeo no meu Taboleiro“, por poñer un exemplo.

5.- Espreme todo o potencial das Cabozadas, un dos sinais de identidade desta rede social e que che brinda unha posibilidade que non encontrarás nin en Twitter, nin en Facebook, Tuenti, Google+, etc. Nas Cabozadas podes chegar a dialogar ao mesmo tempo, mediante mensaxes curtas de non máis de 140 carácteres (é o único espazo de Cabozo onde as mensaxes teñen limitación de carácteres), con calquera usuario rexistrado en Cabozo sígalo ou non, sígate ou non. Ademais calquera outro usuario poderá ler todo o que aquí enlaces ou publiques. Podemos dicir que as Cabozadas son un grande escaparate dentro de Cabozo e o nexo de unión de todos os usuarios rexistrados na web. Unha parte importante do éxito que teñas na captación de novos seguidores dependerá do uso máis ou menos intelixente que fagas desta ferramenta de Cabozo.

Pasa habitualmente polas Cabozadas, conversa cos usuarios que te encontres nese momento, se non os coñeces pica sobre as súas imaxes de usuario e aproveita para botar unha ollada aos contidos dos seus Taboleiros e para ver os seus perfís de usuario, sígueos se te resultan interesantes, comenta as súas entradas e se hai algunha que che resulte de interese para o teu Taboleiro, cópiaa, pero todo iso sen perder o fío da conversación que iniciases nas Cabozadas.

Se te perdes marca a opción “quedin” para ver se alguén te mencionou. Aproveita tamén o teu paso polas Cabozadas para deixar, de cando en vez, “mensaxes gancho” que atraian novos usuarios ao teu Taboleiro, aproveita para iso por exemplo os momentos de menos actividade xa que cando hai moita xente falando ao mesmo tempo adoitan “perderse” rápido as mensaxes.

Todas estas recomendacións poden ser apoiadas polo uso axeitado doutras ferramentas de Cabozo como as Canles de TV, cos cales podes emitir en directo ou en diferido para o resto de usuarios, “Arredor“, o novo servizo de xeolocalización que podes utilizar para xerar contidos e difundir un determinado local ou lugar, etc.

(Lectores no gallegos pinchad aquí)

Rexistrado nesta espectacular rede social, si xa sei que son un ‘fanboy’ pero que queres? verás como despois de facilitar só unha conta de correo, xa podes empezar a explorar e a usar todos os servizos que ofrece Cabozo sen ter que ‘pasar por caixa’.

Cando falo de ‘pasar por caixa’ refírome a que aquí, ao contrario do que sucede noutras redes sociais, non precisas ‘pagar’ con información os servizos que che imos ofrecer e polo tanto non necesitas encher cos teus datos persoais ningún formulario con campos obrigatorios para poder empezar a usar esta rede social…

Aínda así, unha vez investigues ata o último canto da web, pero que buscarás alma de deus? non sexas merluz@ e antes de empezar a interactuar co resto de usuarios pasa pola opción “Configuración” para polo menos cambiar o logo por defecto de Cabozo pola túa imaxe de usuari@.

Se pola contra, despois desa primeira ollada, non tes pensado seguir usando esta rede social, ti o perdes pequeno saltamontes ou… saltaredes, non? non deixes abandonada a túa conta. Vai ás opcións de “configuración” e dáte de baixa. Cabozo segue sendo o mesmo cun rexistro máis ou cun menos e ti non seguirás danando a túa reputación online deixando abandonada unha conta máis… Iso si, se ousas deixar tirada a túa conta nalgunha das rúas cabozeiras atente ás consecuencias forasteiro, e xa te preavisamos, temos un dos mellores servizos grúa do momento e probablemente a mellor xestión de poxas do mundo. Avisado quedas…

Dito isto, pasemos a ver como podemos facer para que o resto de usuarios de Cabozo saiban que “xa estás aquí” Antes de nada, fai o seguinte:

PRIMEIRO:

Recorda pasar por “configuración“ e cambiar a imaxe de usuario. Se ademais engades algún dato máis ao teu perfil como unha pequena descrición (bio), o teu lugar de residencia ou algún dos teus gustos musicais por poñer un exemplo, a túa conta resultará máis atractiva para o resto de usuarios. Aquí tes todo o que podes configurar e recorda, non é obrigatorio cubrir ningún campo e ti decidirás en todo momento que é o que queres compartir e o que non. Agora ben, se es de Burela e queres que a xente che encontre polo teu lugar de residencia pero non o indicas… Cabozo non fai milagres, eh!

SEGUNDO:

Sobe algún contido ao teu muro (pestana “meu taboleiro“). Se queremos darnos a coñecer e captar a atención doutros usuarios será mellor ofrecerlles algo antes de que entren ao noso Taboleiro e o vexan tristeiro e baleiro, non? Ademais, se resulta interesante pode que outros usuari@s con máis seguidores cópieno ao seu Taboleiro e axude a darte a coñecer na rede. O que? Iso xa é cousa túa amigo… Recorremos outra vez á música? Quizais compartir un vídeo de YouTube con algunha das nosas cancións favoritas sexa unha forma amena de empezar… Agora ben, se xa tes moi claro que en Cabozo queres relacionarte principalmente con expertos en física cuántica quizais sexa mellor que subas un vídeo, foto ou noticia sobre os tan de actualidade neutrinos por poñer un exemplo… Captas a mensaxe?

Ben, feito isto xa podemos dicir que estás asead@ e presentable para empezar a interactuar co resto de usuarios cabozeir@s. Por fin! ¬¬

Segue agora estes 8 pasos e nunca máis te sentirás invisible en Cabozo. Imos alá!

1.- Mira se alguén che deixou algunha mensaxe de benvida no teu muro (xa sabes, pestana “meu Taboleiro“) e se é así, respóndelle. Pica directamente sobre o texto das súas mensaxes e a túa resposta aparecerá publicada no mesmo fío. Xa postos, podemos picar sobre os seus nomes ou imaxes de usuarios para acceder aos seus Taboleiros (muros) e ver os seus contidos. Quizais poidamos deixar algún comentario e sobre todo non se che esqueza seguir o usuario se che resultou interesante. Para iso só tes que picar sobre a opción “seguir usuario“

2.- Comproba se algún usuario xa te segue a ti. Veralo ou ben na pestana “Lox” (onde irás recibindo distintos avisos automáticos) ou nas opcións da columna da dereita onde verás “Seguido por (x)” Se entre paréntese aparece algún número ese será o número de seguidores que tes. Se tes algún seguidor pica sobre o devandito indicador e verás como se despregan os seus nicks ou nomes de usuario. Recomendo que tamén os sigas ti. Xa sabes, picas sobre os seus nomes e xa dentro dos seus Taboleiros en “seguir usuario“

Nesta fase de facernos visibles e darnos a coñecer, ti non te cortes á hora de seguir aqueles usuari@s cos que te vaias cruzando polo camiño. Co tempo, e a medida que vaias coñecendo máis xente, xa chegará o momento de filtrar e seguir só a aqueles que realmente che interesen. Agora o que nos interesa é que saiban que xa estamos aquí e ver “vida” na web

3.- Segue as contas de Deckarz e LegnaLof, os dous ‘capos‘ de Cabozo Aínda que adoitan andar todo o día por aí de sarao en sarao con Mark Zuckerberg e compañía juju (mira que rachan do Facebook pero ao final…) é o que ten compartir ser mozos e ricos ¬¬ xa sabedes, deus críaos e eles… O caso é que ninguén mellor ca eles coñece Cabozo e nalgún momento entre festa e festa pode que vos boten unha man e axúdenvos a sacarvos dalgún aperto cabozeiro. Se por agora non te cruzaches con eles podes buscalos no buscador de Cabozo que atoparás na opción “usuari@s de cabozo/búsquedas“. Escribe os seus nomes de usuario (individualmente) e dalle a “enviar“. Accederás aos seus Taboleiros e dende aí pódelos seguir. Tamén recomendo seguir outras contas de Cabozo como AchegasCabozo ou Xeolocaboza.

4.- Segue os usuari@s máis activos de Cabozo. É recomendable, sobre todo ao principio, seguir os usuarios máis activos da web. A forma máis doada de facelo é, de novo, dende a opción “Usuari@s de Cabozo/Búsquedas” onde ao acceder veremos un Ranking de usuarios por Karma (indicador do nivel de actividade dun usuario en Cabozo). Picando sobre os seus nomes accedemos aos seus Taboleiros e dende aí poderémolos seguir como sempre en “seguir usuario“.

5.- Segue os usuari@s da túa vila, cidade, provincia… ou dunha determinada localidade. Outra vez en “Usuari@s de Cabozo/Buscas“, no buscador que comentei antes, marcando agora previamente a opción “cidade“, escribe o nome da localidade a buscar, por exemplo Viveiro e dalle a “enviar“. Aparecerán todos os usuarios que facilitaron ese dato na configuración da súa conta. Picando sobre as súas imaxes de usuario accedes tamén aos seus Taboleiros. Unha vez aí, xa sabes como seguilos.

6.- Non deixes de pasar por algúns dos xa máis de 120 grupos públicos existentes en Cabozo. Participa nestes grupos achegando contidos, comentando, etc. Hai grupos de diferentes temáticas: noticias, deportes, fotografía, coches, música, vídeos, sexo (hai máis grupos, eh! A ver se agora vas pasar aquí todo o tempo ) cine, saúde, comida, curiosidades, mascotas, ecoloxía, viaxes, motos, tecnoloxía, redes sociais, praias, vídeos, etc. Únete aos que che parezan máis interesantes e poderás coñecer xente cos mesmos intereses ca ti.

7.- Sácalle partido a “Arredor“, o novo servizo de xeolocalización que estreamos no renovado Cabozo. Como? Moi doado! Busca ou, se non a hai, crea a marca dese local, esa praia, restaurante, negocio, etc. que tanto che gusta e coñece xente coas mesmas preferencias ca ti de entre os que vaian comentando esas marcas (localizacións de puntos de interese creados polos propios usuarios)

8.- Pasa sempre que poidas polas “Cabozadas“. Deixei as Cabozadas para o final por ser un dos sinais de identidade de Cabozo e pola súa importancia no funcionamento global desta rede social.

As Cabozadas é algo que non teñen nin Twitter, nin Tuenti, nin Facebook, nin Google+… Podemos dicir que é o grande escaparate de Cabozo ou ese gran patio de veciños que toda comunidade ten. O nexo de unión de todos os usuarios cabozeiros. O que non pasase polo menos unha vez polas Cabozadas non é ninguén en Cabozo

A principal característica desta ferramenta é que aquí poderás coincidir e dialogar, mediante mensaxes curtas de non máis de 140 carácteres, con calquera usuario rexistrado en Cabozo, sígalo ou non, sígate ou non. E ademais todo o que aquí escribas ou enlaces pode ser visto por calquera outro usuario rexistrado en Cabozo.

Se analizas ben o que acabo de comentar verás o enorme partido que se lle pode sacar a esta opción de Cabozo facendo un uso intelixente da devandita ferramenta.

(Lectores no gallegos pinchad aquí)

Dende primeira hora da mañá de hoxe, sábado 15 de outubro de 2011, tedes á vosa disposición a nova versión de Cabozo.

Esta nova versión chega grazas ao acordo de colaboración alcanzado hai uns meses coa empresa lucense de deseño m-tic! á que dende aquí queremos agradecer a súa colaboración sen ningún tipo de contraprestación económica de por medio, algo moi difícil de lograr nos tempos que corren. Graciñas rapazas!

Recomendamos que fagades un F5 en cada ‘rinconciño’ de Cabozo ao que entredes para que o navegador vaia refrescando e poidades ver perfectamente a nova versión da web

Saúdos!

(Lectores no gallegos pinchad aquí)

Cabozo é unha rede social creada totalmente dende cero baixo código propio. Como todo ‘produto’ único e orixinal conta cunha filosofía de uso propia, coñécela? Sabes como invitar a Cabozo aos teus coñecidos? Sabías que Cabozo ofrece servizos exclusivos aos seus usuarios como a posibilidade de contar cunha canle de TV persoal para emitir en directo ou en diferido para o resto de usuarios?…

Pica sobre as seguintes opcións para coñecer máis sobre elas:

- Cabozo, outra forma de entender as redes sociais

- Realmente coñeces a filosofía de uso de Cabozo? Aquí tes algunhas pistas!

- Queres invitar a outra persoa, empresa ou asociación a Cabozo e non sabes como? Preme sobre este texto!

- A nosa primeira vez en Cabozo

- A importancia dos ‘seguimentos’ en Cabozo

- Canles de TV e Videochamadas en Cabozo

- Coñeces a túa dirección de Cabozo? Le isto!

- Arredor: a xeolocalización chega a Cabozo

- Tabomobil: a nova versión web de Cabozo para smartphone

- As contas de Cabozo noutras redes sociais

Moita máis información e toda a actualidade sobre Cabozo no… Cabozo blog!

(Lectores no gallegos pinchad aquí)

Competir nun sector onde os rivais son nada máis e nada menos que Facebook, Twitter, Google e compañía é realmente complicado. Si, nós non competimos contra o bar da esquina ou contra “Talleres Manoliño” senón contra eses xigantes internacionais…

Se a esa dificultade sumamos as limitacións que en moitos aspectos supón dirixir o noso produto case exclusivamente aos cidadáns galegos e, dentro deles, especialmente aos que falan en galego a cousa complícase aínda máis.

Facer todo isto de forma independente multiplica os obstáculos que atopamos no camiño. Que un proxecto como o noso estea por exemplo nalgunha “lista negra” por non facer o conto e defender os nosos intereses é para botarse a rir… por non chorar

Que moitos dos que din defender o galego, en 3 anos, non desen nin unha simple oportunidade para coñecer e ver o pontencial desta ferramenta “made in Galicia” é para mandar todo á merda hai moito tempo…

Poder ir ou non logo xa é outra cousa, pero que só contasen con Cabozo nun ou dous eventos dos moitos que hai hoxe en día na xeografía galega sobre redes sociais, case un por semana é un claro exemplo, polo moito que deixa entrever, do ridículo nivel de quen pretende ‘representar’ o social media galego ou/e do pouco valor que por estas terras se lles dá aos nosos productos orixinais.

Se despois de 3 anos na rede galega os cidadáns aos que foi dirixido Cabozo non fan un uso desta plataforma como para que compense mínimimente os enormes esforzos que supón manter e desenvolver un proxecto como este, unha de dúas: ou pechamos e punto ou intentamos buscarnos a vida noutro lado.

E a verdade, despois de todos os traballiños pasados durante 4 anos desenvolvendo dende cero un produto único, orixinal e cunha filosofía de uso propia, a idea de pechar non nos fai nin puta graza así que xa sabedes cal sería a nosa primeira opción.

Chegado o caso, non aceptaremos ningún tipo de lamento ou crítica e moito menos vindo daqueles grazas a cuxa indiferenza ou pasotismo este proxecto poida verse obrigado a converterse en algo distinto ao que pretendeu ser, un produto galego alternativo, feito por e para os usuarios galegos e redactado integramente na nosa lingua.

E todo isto dicímolo agora que estamos a punto de presentar unha nova versión de Cabozo cun deseño moito máis atractivo, o último esforzo para ver se realmente este produto é viable (en termos de uso) como produto dirixido exclusivamente a usuarios galegos.

Se non funciona “ímonos” e non pasa nada. Agora ben, que despois non saian os 4 ridículos de sempre a tocar as pelotas cando reformulemos outras opcións para seguir “vivos”. Como por exemplo aqueles, que agora din non usar Cabozo porque é unha web “pechada” cando Cabozo foi unha web de acceso libre durante anos e a día de hoxe aínda non se lle negou un convite a ninguén.

É algo tan sinxelo coma… se non nos queren ímonos pero que logo non nos veñan con contos

(Lectores no gallegos pinchad aquí)

Coa idea de axudar á difusión desta rede social creamos algunhas contas ‘espello’ de Cabozo noutras redes sociais. Nelas poderás encontrar unha pequena mostra dos variados contidos que a diario comparten os usuarios en Cabozo. Tamén poderás contactar con usuarios rexistrados e pedirlles un convite para poder unirte a esta rede social se… aínda non o fixeches?!

As contas de Cabozo noutras redes sociais son as seguintes (pica sobre as imaxes para acceder a elas):

Esta é a nosa conta no Twitter

- En Twitter contamos coa maior comunidade de usuarios fóra de Cabozo. No momento da publicación desta entrada contamos con máis de 1.250 seguidores

A nosa páxina no Facebook

- En Facebook contamos cunha páxina seguida neste momento por máis de 330 persoas.

A nosa páxina en Tuenti

- Tamén contamos dende hai pouco cunha páxina en Tuenti á cal xa se uniron 190 persoas.

Cabozo Televisión, a nosa canle en Youtube

- Esta mesma semana creamos “Cabozo Televisión“, a nosa canle en YouTube, por agora sen demasiados contidos

Calquera outra conta, perfil ou páxina, que non sexan as que aquí mostramos nada teñen que ver con Cabozo.com. Se sospeitas que alguén pode estar a facerse pasar por nós agradeceriamos que nos avisases a través da conta de correo: achegas@cabozo.com. Graciñas

(Lectores no gallegos pinchar aquí)

Traemos dúas imaxes* das probas que xa se están a levar a cabo coa próxima versión de Cabozo

O pasado fin de semana Deckarz montou a primeira versión offline do futuro Cabozo. Esta semana, tanto el coma LegnaLof empezaron as primeiras probas da nova versión. Aínda que queda bastante traballo por facer entre probas, axustes, cambios de última hora, etc., xa podemos dicir que xa hai unha versión do novo Cabozo funcionando

Xa está máis preto o día no que todos os caboZeir@s poidamos gozar deste novo Cabozo grazas á colaboración da empresa lucense m-tic!

*As imaxes que podedes ver nesta ‘entrada’ non son un fiel reflexo da versión definitiva. Esta versión de probas pode sufrir algunha modificación e detalles como por exemplo as imaxes dos usuarios non son visibles.

No alto da montaña, onde o silencio acolle tanta beleza… prepárase con sixilo o mellor dos acontecementos!

NUNCA VISTO, NUNCA VIVIDO

Álzase a espiritualidade da profecía, revive a luz do lume, a música cambia o ambiente marabilloso e a auga baña sensacións…

A PARTIR DE ENTÓN NON PODERÁS ESQUECER

As portas abriranse só cando a flor de loto se peche, entorno ás once da noite. Nese momento poderás alcanzar… o NIRVANA

UNICAMENTE PODERÁS ACCEDER CON CONVITE, pero grazas aos organizadores do evento temos convites (válidos para dúas persoas) para “premiar” os usuari@s máis activos de Cabozo e xente da nosa confianza!

Unha oportunidade única de vivir unha festa nun lugar idílico, cunha decoración exclusiva e ambientada por Ángel Linde, DJ residente de Pachá Ibiza, un dos mellores clubes do mundo.

Pasa por Cabozo e fala con LegnaLof se queres saber como conseguir o teu convite. Tamén recomendamos seguir a páxina do evento en Facebook (Aínda que tamén intentaremos ir informando en Cabozo)

(Lectores no gallegos pinchar aquí)

Veciños do barrio da Residencia de Lugo cortan a Avda. das Américas en sinal de protesta polo abandono das instalacións do antigo hospital Xeral-Calde.

Pensan reunirse todos os xoves para esixir as autoridades que cumpran as promesas adquiridas para as devanditas instalacións.

Xa o xoves pasado, vestidos de loito simularon o velorio do antigo hospital

Uns 400 veciños do barrio da Residencia de Lugo denuncian xunto ao Xeral-Calde o abandono das instalacións do antigo hospital lucense.

Mediante a simulación do velorio do Xeral-Calde esixiron ás autoridades competentes que cumpran as promesas e os compromisos políticos adquiridos.

Unha gran pancarta co lema “As promesas sexan feitos. Servizos prometidos xa!“ presidía a concentración de veciños.

Ademais puidéronse ler e escoitar proclamas como: “Sin o Xeral esto é criminal“, “Cierran negocios, más paro” ou “O barrio da Residencia xa non ten paciencia“

Aquí podedes ver máis fotos e máis vídeos da concentración de veciños.

Aínda non es usuario de Cabozo, a rede social galega? Queres un convite? Podes contactar connosco aquí, na nosa conta de Twitter ou na nosa páxina de Facebook. Únete!