Cabozo volve as súas orixes e convértese, de novo, nunha web privada á que só se poderá acceder por convite. Explicamos os motivos
Pois si! Tras dous anos na rede galega estamos reformulándonos seriamente se paga a pena seguir ou non con este proxecto… Manda carallo! Que difícil é encontrar adeptos en Galicia sen SocialEngine de por medio! 
Cremos que Cabozo é unha web desaproveitada para o que ofrece, que o uso que se lle dá, a nosa única motivación para seguir adiante, empeza a non compensar o enorme esforzo e as moitas horas de dedicación que require sacar adiante un proxecto como este. E vemos con certa resignación como a sociedade galega non acaba de apostar, ademais de polas redes sociais internacionais, pola única rede social propia, orixinal e na súa lingua.
Ante esta orquestra… digo ante este panorama 
optamos por recuperar a filosofía inicial de Cabozo, que pasa a ser de novo unha web privada, esperando non ver na web, nestes próximos 4 ou 5 meses, unha actividade parecida ao resultado da aplicación da Lei Sinde 
que nos obrigue finalmente a reorientar o proxecto a “mercados máis agradecidos” ou… a abandonalo definitivamente, opción esta última que sería a que máis pena nos daría pero a única que nos aseguraría mellorar o noso poder adquisitivo
Se algo si temos claro despois de todo este tempo, ademais de saber o perigosos que poden chegar a ser os parvos motivados (véxase senón o exemplo dese que a lía pervi, digo parda cada vez que lle deixan escribir sobre tecnoloxía nese xornal que di dar Voz a Galicia ), é que Cabozo non pode nin debe vivir nin do tráfico da web (máis que aceptable para ser unha web que require de rexistro obrigatorio) nin do número de usuarios rexistrados, máis de 3.500. De que serve unha rede social con moitos usuarios pero que apenas participen? Nós cremos que para nada salvo para darlle algo que copiar e pegar ao maior troll-eiro galego de todos os tempos… e para iso quedamos na casa coloreando coas nosas pinturas da marca TiTantoSabesAzlotuz
Cremos polo tanto que a principal consecuencia de “privatizar” Cabozo (Non, non! Tranquilos que non nos vendemos a ese partido político que todos estades a pensar… ), que agora só se poida acceder á web mediante convite, non só non ten porque ir en contra do desenvolvemento futuro de Cabozo, como algúns poden pensar, senón que debería servir como un elemento dinamizador da actividade dos actuais e futuros usuarios, e polo tanto da verdadeira razón de ser deste tipo de webs: a participación.
Con esta medida podemos, por un lado, minimizar o máximo posible o rexistro masivo de usuarios (normalmente motivados por marabillosas publicacións na prensa sobre Cabozo canto sensacionalismo mimá!) que chegan “por botar unha ollada” e sen tempo nin ganas para coñecer o que realmente lles pode ofrecer a web, desaparecen para sempre. O problema deste tipo de rexistros xa non é que non acheguen nada ao proxecto, senón que por descoñecemento, poden chegar a dar unha imaxe irreal e negativa do que verdadeiramente é Cabozo.
Queremos que a maioría dos futuros usuarios cheguen a Cabozo por algún tipo de vínculo con usuarios da web (amizade, “colegueo”, proximidade…)
Por outro lado cremos que adoptando esta medida convertemos os nosos usuarios, aínda máis, nos verdadeiros xuíces do futuro de Cabozo. Agora só eles teñen o poder de decidir se queren que isto siga crecendo, invitando a xente comprometida e que participe activamente na web, ou non, invitando a usuarios sen ningún vínculo ou interese na web ou, simplemente, non invitando (recomendando) a web a ninguén.
Que che parece que na web hai moitos usuarios que falan alemán e son pro iPhone e a ti gustaríache que houbese máis usuarios que falasen inglés e fosen pro Android? Agora está nas túas mans! Ti decides quen entra en Cabozo!
Probablemente os que máis beneficiados saen de todo isto son os nosos Superusuarios ou usuarios máis activos, que agora teñen nas súas mans a capacidade real de decidir que vai pasar con Cabozo. Eles son a verdadeira esperanza deste proxecto e do uso que fagan durante os próximos meses dos seus novos “poderes” (os convites) dependerá en boa medida o futuro de Cabozo.
Con iso non queremos criticar os usuarios pasivos, que sempre serán necesarios en certa medida, para que os activos sexan o que son Difícilmente os usuarios activos poderíanse realizar sen pasivos…
Como enviar convites?
Xa podes enviar convites dende a opción “Usuarios de Cabozo“. Unha vez dentro atoparedes a ferramenta que permite enviar convites vía correo electrónico (pica para ver sobre a imaxe anterior). Cada usuario dispón de 5 convites.
E TI QUE OPINAS DE TODO ISTO? O principio do fin ou a fin dunha etapa?
Tags: cabozo, cabozo.com, convites, galega, invitaciones, privada, red, rede, social, web
enero 28th, 2011 at 01:22
Mentres ía lendo a entrada do blog, ía, por unha banda, comprendendo os vosos motivos e, por outra… calculando se podería seguir co meu proxecto didáctico.
É obvio que cada usuario lle dá a rede social que emprega (en contra do que di ese paisano, eu si penso que Cabozo é unha rede social, e penso que teño argumentos de sobra) o uso que quere. No meu caso, o experimento didáctico en Cabozo tivo un resultado de 10 sobre 10. Desafortunadamente estiano non puiden seguir, pero foi por quedar no paro e non porque fracasara o experimento… de feito pensaba continuar e presenta-lo proxecto a concurso para conseguir máis ordenadores para as/os meus alumnas/os.
Expliquei os meus motivos da escolla de Cabozo entreoutras redes no cuestionario de caboceira do mes, e agora non veñen todos a conto, pero un deles, o máis importante para min como profesora, era que o Cabozo salvagardaba a privacidade do alumnado participante como ningunha outra rede podía facer.
A min gustaríame seguir co proxecto didáctico, e pensaba levalo alí donde me levara a miña inminente emigración física, e en principio non o vía perxudicado pola privatización de Cabozo… ata que cheguei á última liña en negriña desta entrada. Ó final resulta que toda privatización acaba por ser limitación, debe ser cousa do karma da palabra! Espero que poida ser negociable eso dos 5 convites, se non xa me vexo emigrando tamén virtualmente.
enero 28th, 2011 at 12:33
Ola Lupe! Que tal? Todo é negociable claro, e máis nun caso como o teu. Chegado o caso falamos. Unha aperta
enero 28th, 2011 at 15:03
O do numero de invitacions non e problema
enero 29th, 2011 at 16:03
Pessoalmente, acho que umha boa opçom para vós seria a nova web social distribuida que se está ensaiando com Diaspora. Ou com os APIs de OpenSocial e demáis. Claro que todo isso depende da orientaçom que lhe queirades dar.
Polo resto, nom vos desanimedes que ainda quedam muitas cousas por fazer na rede galega e Cabozo tem já ganhado um lugar nela.