Cabozo blog

O secretario Xeral do PSdeG, Pachi Vázquez, someteuse esta semana ás preguntas que os internautas lle fixeron chegar nos últimos días a través das redes sociais Facebook,  Twitter e a galega Cabozo.

Diversas cuestións da actualidade política, económica e social, tanto do ámbito local como autonómico e estatal foron formuladas ao político galego.

Vázquez tamén foi preguntado pola súa experiencia nas redes sociais, e concretamente sobre a súa experiencia na rede social galega Cabozo. Dixo apostar “firmemente polas redes sociais” e invitou a todas as formacións políticas, sociais e económicas a participar nelas. “Eu síntome cómodo e encantado. E especialmente coa nosa rede social galega, que ten unha visión propia, que en ningún caso está reñida con estar noutras redes”.

No vídeo adxunto, podedes ver o momento concreto no que responde á pregunta sobre Cabozo no minuto 16:48 (fonte orixinal: web do PSdeG)

Ánxel Folgueira participará, en representación de Cabozo.com, na mesa redonda “Atrapad@ na rede?” onde tratará de dar o seu punto de vista sobre a base da súa experiencia no desenvolvemento da rede social galega. Xunto a el intervirán Pablo Belay e María Yañez representando Chuza e A Navalla Suíza respectivamente.

A intervención terá lugar o próximo mércores 13 de abril na Facultade de Ciencias Políticas e Sociais da Universidade de Santiago de Compostela, con motivo da celebración das II Xornadas da Mocidade Galega que se celebrará entre os días 12 e 14 de abril en Compostela e os días 29 e 30 do mesmo mes en Castrelo de Miño.

Santiago de Compostela acollerá o próximo sábado 26 de febreiro “Compostweets 2011″, o I Encontro anual de social media en Galicia que pretende ser un lugar de encontro para os profesionais e apaixonados pola web 2.0

Este ano o evento céntrase en Twitter, para algúns unha rede social e para outros un medio de comunicación, pero sen dúbida unha das ferramentas da web 2.0 máis utilizada e de maior crecemento entre os usuarios galegos.

Dende Cabozo queremos aplaudir e apoiar a iniciativa ademais de suxerir para futuras edicións un pequeno espazo no devandito evento para dar a coñecer as ferramentas social media existentes en Galicia.

O pasado martes 7 de decembro Cabozo foi convidado a unha charla sobre redes sociais no programa “A Tarde” da Radio Galega, espazo presentado por Pepe Carreira.

No devandito programa tamén interviñeron os responsables de ikiMap, servizo web galego para compartir mapas, e RedeLibros, a rede social galega do libro.

Pica sobre a imaxe adxunta para acceder ao enlace onde poderás escoitar as entrevistas. A parte dedicada a estas tres webs galegas empeza no minuto 32:50 (Se queredes pasar directamente ao espazo dedicado a Cabozo.com avanzade ata o minuto 41:30).