Se tes un móbil ou tablet, Cabozo vai contigo a todas partes Utiliza Cabozo dende calquera dispositivo móbil sen necesidade de descargar unha aplicación, pero coa mesma comodidade que ofrecen estas.

A versión móbil de Cabozo debería funcionar en calquera dispositivo móbil con conexión a Internet.

Se aínda non tes convite para entrar en Cabozo, pide aquí o teu! Temos para tod@s!

COMO ACCEDO Á VERSIÓN MÓBIL DE CABOZO?

Entra en cabozo.com/tabomovil.php dende o navegador do teu móbil (enlace permanente na portada de Cabozo en “Tabomobil”)

QUE PASOS DEBO SEGUIR PARA USAR A VERSIÓN MÓBIL DE CABOZO COMO UNHA APLICACIÓN? 

Explicamos os pasos a seguir en dous dos smartphones máis estendidos do momento. O proceso é similar no resto de móbiles:

ANDROID (Samsung Galaxy S3)

1. Accedemos á versión móbil de Cabozo dende o noso dispositivo móbil e introducimos nome de usuario e contrasinal

2. Permitimos ao navegador que recorde os nosos datos de usuario para non ter que meter usuario e contrasinal cada vez que entremos

3. Cando esteamos na pantalla de opcións do Tabomóbil, creamos un marcador (ou favorito, depende do navegador) e gardámolo nos marcadores do móbil como Tabomóbil ou CabozoMóbil (por exemplo)

4. Unha vez creado o marcador, imos aos ‘widgets’ do noso móbil e seleccionamos “Marcador” para que abra os marcadores que temos gardados. Seleccionamos Tabomóbil ou CabozoMóbil (como o gardaramos antes) e xa temos un acceso directo dende o escritorio, como calquera outra aplicación, á versión móbil de Cabozo

5. Cando deixamos de usar o Tabomóbil saímos sen pechar sesión, así cada vez que entramos accedemos directamente á pantalla de opcións sen necesidade de meter usuario e contrasinal

iOS (iPhone 5)

1. Accedemos á versión móbil de Cabozo dende o noso iPhone e introducimos nome de usuario e contrasinal

2. Permitimos ao navegador (Safari) que recorde os nosos datos de usuario para non ter que meter usuario e contrasinal cada vez que entremos

3. Dende a pantalla de opcións do Tabomóbil, creamos un favorito (ou marcador, depende do navegador) e gardámolo, por exemplo, como CabozoMóbil

4. Unha vez creado o favorito engadímolo á pantalla de inicio e xa temos un acceso directo dende o escritorio, como calquera outra aplicación, á versión móbil de Cabozo

5. Cando deixamos de usar o Tabomóbil saímos sen pechar sesión, así cada vez que entramos accedemos directamente á pantalla de opcións sen necesidade de meter usuario e contrasinal

Notificacións:

A falta de notificacións podémola suplir marcando a opción “Avisos por correo electrónico” na configuración da nosa conta de Cabozo, opción que recomendamos por resultar bastante práctica e nada molesta (recorda meter na configuración a conta de correo que teñas configurada para recibir notificacións no móbil)

Catro son as principais novidades:

LOX

Esta opción que mostraba automaticamente avisos das actualizacións dos usuarios que seguimos, foi completamente redeseñada. Agora elimínanse eses avisos e no seu lugar móstranse directamente as actualizacións.

NOVAS

Agora tamén no Tabomóbil as noticias de Galicia, os tuits, as fotos máis galegas de Instagram, Flickr.., os vídeos máis galegos de YouTube, o tempo e moito máis.

TABOLEIROS (IMAXES)

As imaxes dos taboleiros agora vense a un tamaño maior.

PANTALLAS

Agora o Tabomóbil foi optimizado para que se adapte mellor aos distintos tamaños de pantalla dos smartphones.

Para coñecer todas as características da versión web de Cabozo para móbil, le a seguinte entrada: Nova versión móbil de Cabozo (Tabomóbil)

Estreamos nova versión web de Cabozo para móbil, coñecida entre os cabozeir@s como Tabomóbil

CREA UN ACCESO DIRECTO DENDE O ESCRITORIO DO TEU MÓBIL

Aínda que dende a portada de Cabozo atoparedes un acceso permanente ao Tabomóbil, é moito máis útil crear un acceso directo dende o escritorio do voso móbil para acceder coma se dunha aplicación se tratase (exemplo na imaxe superior)

Accedede ao Tabomóbil dende o navegador do voso móbil e unha vez dentro, despois de meter o voso contrasinal e usuario, gardádeo en favoritos. Logo, xa poderedes crear o acceso directo.

OPCIÓNS DA NOVA VERSIÓN MÓBIL DE CABOZO

Esta é a pantalla principal do Tabomóbil e dende ela poderemos acceder a todas as opcións. Vexamos que podemos facer dende cada unha delas:

Meu Taboleiro (muro):

Dende Meu Taboleiro podemos ver todo o que se publica no noso muro de Cabozo. Se alguén deixa algún comentario nalgunha desas publicacións debaixo da mesma veremos o “nº respostas” e picando sobre esa publicación veremos os devanditos comentarios. Na imaxe superior observamos como nunha das publicacións temos 3 respostas/comentarios. Se picamos sobre ela veremos eses comentarios:

Nova Mensaxe:

Dende esta opción podemos publicar novas mensaxes no noso taboleiro (muro) e achegar unha imaxe e/ou un vídeo do YouTube. Ademais dásenos a opción de xeolocalizar a mensaxe e mesmo a posibilidade de crear unha marca (dun sitio de interese, praia, restaurante, etc.) á que logo o resto de usuarios poden acceder dende “Arredor“.

Respostas:

Dende esta opción (que cambiará a cor vermella se hai novidades) veremos as respostas que recibamos a calquera conversación na que participemos nun taboleiro, sexa noso ou doutro usuari@. Se picamos sobre as devanditas respostas verémolas no fío orixinal. Podemos borrar dun golpe todas as respostas pendentes de ver picando en “Borrar pendentes“.

Lox:

Como na versión web avísanos (cambiando a cor vermella) cada vez que se actualiza o taboleiro dun usuari@ ao que seguimos, cando empeza a seguir a outro usuario, cando sobe unha nova imaxe aos seus álbums, etc. Picando sobre os avatares accedemos ao taboleiro (muro) dese usuario.

Cabozadas:

As Cabozadas son o gran punto de encontro para todos os usuarios de Cabozo, un chat global onde falar en tempo real con todos os usuarios que pasen por alí nese momento. É un gran escaparate onde podemos darnos a coñecer e dar difusión aos contidos do noso taboleiro (calquera usuario poderá ver o que aquí publiquemos aínda que non nos siga nin o sigamos). Do bo uso que fagamos das Cabozadas dependerá en boa medida o incremento do noso número de seguidores e con iso da nosa audiencia real en Cabozo. Pica sobre o texto das mensaxes para responder directamente.

Privados:

Aquí veremos (cambia a cor vermella cando recibimos algún) as mensaxes privadas que recibamos. Picando sobre o texto das mesmas responderemos directamente, tamén de forma privada. Se picamos sobre “Contactos habituais” veremos os avatares daqueles usuarios cos que nos enviamos mensaxes privadas de forma habitual para facilitarnos acceder aos seus taboleiros e poder enviarlles novas mensaxes privadas.

Seguimentos:

Avísanos dos usuarios que se conectaron máis recentemente a Cabozo de entre os que seguimos. Picando sobre os seus avatares poderemos acceder aos seus taboleiros, seguilos/deixar de seguilos ou enviarlles un privado.

Arredor:

Descobre sitios de interese (aloxamentos, bares, comercios, eventos, festas, noticias, praias, restaurantes, etc.) recomendados por outros usuari@s e cabozeiros próximos á túa localización real. Descobre tamén os doutras zonas desprazándote polo mapa e “xogando” co zoom.

Picando sobre as marcas veremos a información que conteñen. Se picas sobre esa información aparecerá estendida e se hai, tamén os comentarios. Tamén poderás engadir comentarios aos que podes achegar imaxes. Street View dispoñible.

Outras das peculiaridades de Arredor, nesta versión móbil de Cabozo, son as Rutas. As rutas indícannos como chegar dende a nosa localización actual até calquera dos puntos de interese marcados no mapa.

Por último comentar, que picando sobre os avatares dos usuarios en calquera parte do Tabomóbil accederemos a unha xanela que nos permitirá seguilo ou deixar de facelo, enviarlle unha mensaxe privada ou acceder ao seu taboleiro.

NOTA: Buscamos empresa ou desenvolvedor interesados en adaptar esta versión web de Cabozo para móbil a versións Android e iOS. Se é o teu caso non dubides en poñerte en contacto.

Quen nos ía dicir alá polo 2008 que Cabozo.com, aquela pequena web que estabamos a crear coa única pretensión de manter o contacto dun reducido grupo de colegas, acabaría aparecendo algún día na mesma lista na que aparecen webs de empresas ou institucións tan populares como Zara, o Deportivo da Coruña, Mundo R, Estrella Galicia, a Universidade de Santiago de Compostela, a Xunta de Galicia, Rojadirecta, Novagalicia Banco, o Sergas, Blusens, Adolfo Dominguez… entre outras

Por primeira vez tras 3 anos na rede galega, Cabozo entra no TOP100 de webs máis populares, ocupando o posto 98, como podedes observar no ranking elaborado por Código Cero.

Debemos valorar moi positivamente este feito máis sendo esta unha web creada totalmente dende cero baixo código propio, sendo por tanto unha web orixinal e cunha filosofía de uso propia, e desenvolvida por só dúas persoas no seu tempo libre coa dificultade engadida, a efectos de difusión, de ser unha web redactada exclusivamente en galego e totalmente independente.

Entre as webs en galego non institucionais, Cabozo ocupa o posto número 12 en popularidade sendo neste caso os tres primeiros postos para Mundo-r.com, Blogaliza e Código Cero.

Esta claro que isto non se lograría sen o apoio dos miles de seguidores, moitos xa coleg@s, que nun ou outro momento apostastes por Cabozo. Por iso dende aquí agradecémosvolo e aproveitamos, de paso, para desexarvos unhas felices festas e un próspero 2012!!!

Co novo deseño da web esperando á volta da esquina aproveitamos para facer un pequeno repaso á historia de Cabozo recordando as distintas páxinas de inicio que tivo durante estes anos. Ademais presentamos a que será definitivamente a próxima “portada”.

Pantry, a precursora de Cabozo

Se hai algo pouco coñecido de Cabozo é que cando xurdiu este proxecto a finais de 2007, Antonio Mariño (Deckarz) bautizouno como Pantry (despensa, en inglés) denominación que mantivo unhas poucas semanas. Como podedes ver na imaxe superior, a pantalla de inicio de Pantry xa adiantaba os característicos tons laranxas de Cabozo ademais das cores e o tipo de fonte do futuro logo de Cabozo.

Primeira páxina de inicio de Cabozo como tal

En xuño de 2008, despois duns meses nos que a web estivo redactada integramente en inglés para facilitar o seu uso a usuarios alemáns, outra das curiosidades de Cabozo, decídese traducir a web ao galego. Na imaxe superior podedes ver o que consideramos a primeira portada de Cabozo xa redactada integramente en galego e uns meses antes de iniciar a súa aventura pública na rede galega.

A portada de Cabozo máis lonxeva ata agora e probablemente a máis popular

En marzo de 2009, aberta xa ao público galego, sendo Ángel Folgueira (LegnaLof) o principal impulsor da devandita apertura, a páxina de inicio recibe unha importante mellora gráfica grazas á colaboración de Fausto Cora. Ata agora esa é a portada de Cabozo que máis tempo permaneceu como páxina de inicio da web e probablemente a máis popular para moitos usuarios. Por primeira vez o característico cabozo (hórreo) do logo adquire maior presenza na portada como podedes ver na imaxe superior.

A portada do actual Cabozo que en breve será substituída

Tras a decisión de limitar o rexistro de novos usuarios unicamente a convite e para facilitar o uso crecente da web dende smartphones, en xaneiro de 2011 decídese cambiar a páxina de inicio por unha versión minimalista. Como curiosidade podemos dicir que é a primeira portada de Cabozo que non conta coa opción para darse de alta libremente na web e a primeira que co tempo acabou incorporando utilidades como o Tabomobil (versión móbil da web) ou Arredor (xeolocalización en Cabozo).

A portada de Cabozo durante as mobilizacións cidadás do 15M

En Maio de 2011, durante as mobilizacións cidadás do 15M, decídese modificar a portada de Cabozo para crear unha versión especial que dese cobertura en tempo real ás principais acampadas galegas e á #acampadasol. Esta versión da portada aínda é accesible dende aquí.

E finalmente, esta será a próxima páxina de inicio da web. A imaxe do futuro Cabozo que en breve dará un importante salto de calidade no apartado gráfico grazas a un deseño acorde, por fin, ao enorme potencial desta rede social

En breve, a próxima páxina de inicio de Cabozo

Traemos dúas imaxes* das probas que xa se están a levar a cabo coa próxima versión de Cabozo

O pasado fin de semana Deckarz montou a primeira versión offline do futuro Cabozo. Esta semana, tanto el coma LegnaLof empezaron as primeiras probas da nova versión. Aínda que queda bastante traballo por facer entre probas, axustes, cambios de última hora, etc., xa podemos dicir que xa hai unha versión do novo Cabozo funcionando

Xa está máis preto o día no que todos os caboZeir@s poidamos gozar deste novo Cabozo grazas á colaboración da empresa lucense m-tic!

*As imaxes que podedes ver nesta ‘entrada’ non son un fiel reflexo da versión definitiva. Esta versión de probas pode sufrir algunha modificación e detalles como por exemplo as imaxes dos usuarios non son visibles.

Ata hoxe o Tabomobil só nos permitía enviar mensaxes ao noso Taboleiro e… nada máis.

A nova versión ofrécenos novas posibilidades e agora, ademais de poder enviar mensaxes ao noso Taboleiro, tamén podemos velos e respondelos. Podemos ver e responder as respostas que recibamos nos Taboleiros doutros usuarios, ver os Lox e acceder a eles, ver e responder as mensaxes privadas que recibamos e quizais o máis esperado, agora tamén podemos facer uso das Cabozadas.

O enlace de acceso á nova versión do Tabomobil é o mesmo que ate agora, así que se xa o tiñas gardado como favorito dende hoxe accederás á nova versión ao entrar.

Se nunca fixeches uso del podes acceder co teu móbil dende este enlace e unha vez dentro gardalo en favoritos para telo sempre a man.

O primeiro que veremos ao acceder é unha sinxela pantalla de acceso onde se nos pide o noso nome de usuario e contrasinal. Outra das novidades é que agora nos gardará os nosos datos para non ter que andar meténdoos cada vez que entremos.

Unha vez dentro veremos a pantalla de opcións: “Meu Taboleiro“, “Nova mensaxe“, “Respostas“, “Lox“, “Cabozadas” e “Privados“

1.- Meu Taboleiro: Aquí podemos ver todas as entradas do noso Taboleiro. Se picamos sobre o texto das mensaxes veremos todas as súas respostas, debaixo das cales teremos a opción “Responder”. Na parte superior temos a opción “Volver”.

2.- Nova Mensaxe: Aquí podemos enviar unha mensaxe ao noso Taboleiro ao cal lle podemos achegar unha imaxe ou un vídeo YouTube (ata agora esta era a única opción que ofrecía o antigo Tabomobil)

3.- Respostas: Aquí vemos as respostas que recibimos aos nosos comentarios en calquera Taboleiro. Se picamos sobre o texto das mensaxes verémolo no seu lugar orixinal e poderemos responder. Esta opción márcanos o número de respostas pendentes. Só desaparecerán se picamos sobre elas para velas no seu lugar de orixe.

4.- Lox: Podemos ver as actualizacións daqueles usuari@s que seguimos, acceder a elas e comentar.

5.- Cabozadas: Funcionan exactamente igual que na versión normal.

6.- Privados: Aquí podemos ver as mensaxes privadas que recibimos e podemos respondelas ou marcalas como lidas. Para respondelas picaremos como sempre sobre o texto das mensaxes.

Por último vemos a opción “Logout“ para desconectarnos.

ACTUALIZACIÓN:

Engadida a posibilidade de xeolocalizar as mensaxes que enviemos ao noso Taboleiro e dúas novas opcións:

7.- Seguimentos: Dende aquí podemos acceder directamente ao Taboleiro daqueles usuari@s que sigamos.

8.- Arredor: Esta opción de xeolocalización, permite ver as “marcas” ou “puntos de interese” que deixaron os usuari@s próximas a nosa localización ou ben buscar eses “puntos de interese” en calquera parte do mundo. As procuras faranse por categorías (interese, evento, restaurante, praia…).

MÁIS AQUÍ:

Aumentan as opcións de xeolocalización do Tabomobil coa inclusión das “Rutas”

Por iso adoitamos dicir que Cabozo é unha rede social con posibilidades similares as de Facebook pero cunha filosofía de uso máis próxima a Twitter (non seguimos só colegas, tamén a quen xere contidos que nos resulten de interese)

Agora quixemos ir un paso máis alá e facilitar a visualización dos contidos dos Taboleiros (nunha versión limitada) tamén dende o exterior.

Polo tanto, calquera persoa, rexistrada ou non en Cabozo, poderá ver o noso Taboleiro sen necesidade de conectarse a Cabozo e dende el poderá acceder ao daqueles usuarios que nos sigan e ao dos que sigamos. Para iso deberá coñecer o noso nome de usuario (tal cal, distínguese entre maiúsculas e minúsculas) ou terlle facilitado previamente o enlace de acceso que será sempre do tipo:

- ht tp://cabozo.com/user/nomedeusuari@

ou

- ht tp://www.cabozo.com/user/nomedeusuari@

Aclarar que a versión do Taboleiro á que se pode acceder dende o exterior de Cabozo é unha versión limitada e polo tanto varias das súas opcións están desactivadas. Se picamos sobre elas redirixirannos á pantalla de inicio. Só poderemos gozar de todas as posibilidades da web se somos usuarios rexistrados.

Que podemos ver SEN estar rexistrado en Cabozo (ou sen conectarnos á web)?

- Ver o número de visitas que ten un Taboleiro
- Podemos ver a canle de Tv do usuario e a súa emisión se é en “aberto”
- Podemos ver as mensaxes e os vídeos, fotos e enlaces adxuntos a estes
- Compartir contidos en Twitter, Facebook ou Chuza
- Subscribirnos aos RSS dos Taboleiros d@s usuari@s
- Ver o perfil dos usuarios
- Ver os usuarios aos que seguen e polos que son seguidos
- Ver os grupos públicos de Cabozo aos que pertence
- Poderemos ver as mensaxes de Twitter dos usuarios se teñen a conta activa en Cabozo

Entre as opcións deshabilitadas están as seguintes:

- Non podemos facer comentarios nin deixar ningunha mensaxe nova
- Non podemos facer uso das iconas para ver dunha ollada todos os vídeos ou fotos adxuntos ás mensaxes dese Taboleiro
- Non podemos ver os álbums de fotos dos usuari@s (nin aínda que sexan públicos)
- Por suposto non poderemos acceder nin as Cabozadas (“microbloggin” e punto de encontro de todos os usuarios cabozeiros), nin á sección Novas, nin a Lox, nin acceder aos grupos, nin facer uso dos chats, nin das videoconferencias, nin acceder a xogos…

Con isto preténdese dotar a Cabozo de novas posibilidades de uso, dar a coñecer un pouco máis as posibilidades reais da web, lograr unha maior difusión e facilitar aos usuari@s compartir os seus contidos.

Por último aclarar que esta opción está activada por defecto. Se algún usuario non quere que se poida acceder ao seu Taboleiro dende fóra de Cabozo poderá desactivar a opción nos seus “Axustes” de usuario.

Este ano o evento céntrase en Twitter, para algúns unha rede social e para outros un medio de comunicación, pero sen dúbida unha das ferramentas da web 2.0 máis utilizada e de maior crecemento entre os usuarios galegos.

Dende Cabozo queremos aplaudir e apoiar a iniciativa ademais de suxerir para futuras edicións un pequeno espazo no devandito evento para dar a coñecer as ferramentas social media existentes en Galicia.

Pois si! Tras dous anos na rede galega estamos reformulándonos seriamente se paga a pena seguir ou non con este proxecto… Manda carallo! Que difícil é encontrar adeptos en Galicia sen SocialEngine de por medio! Cremos que Cabozo é unha web desaproveitada para o que ofrece, que o uso que se lle dá, a nosa única motivación para seguir adiante, empeza a non compensar o enorme esforzo e as moitas horas de dedicación que require sacar adiante un proxecto como este. E vemos con certa resignación como a sociedade galega non acaba de apostar, ademais de polas redes sociais internacionais, pola única rede social propia, orixinal e na súa lingua.

Ante esta orquestra… digo ante este panorama optamos por recuperar a filosofía inicial de Cabozo, que pasa a ser de novo unha web privada, esperando non ver na web, nestes próximos 4 ou 5 meses, unha actividade parecida ao resultado da aplicación da Lei Sinde que nos obrigue finalmente a reorientar o proxecto a “mercados máis agradecidos” ou… a abandonalo definitivamente, opción esta última que sería a que máis pena nos daría pero a única que nos aseguraría mellorar o noso poder adquisitivo

Se algo si temos claro despois de todo este tempo, ademais de saber o perigosos que poden chegar a ser os parvos motivados (véxase senón o exemplo dese que a lía pervi, digo parda cada vez que lle deixan escribir sobre tecnoloxía nese xornal que di dar Voz a Galicia ), é que Cabozo non pode nin debe vivir nin do tráfico da web (máis que aceptable para ser unha web que require de rexistro obrigatorio) nin do número de usuarios rexistrados, máis de 3.500. De que serve unha rede social con moitos usuarios pero que apenas participen? Nós cremos que para nada salvo para darlle algo que copiar e pegar ao maior troll-eiro galego de todos os tempos… e para iso quedamos na casa coloreando coas nosas pinturas da marca TiTantoSabesAzlotuz

Cremos polo tanto que a principal consecuencia de “privatizar” Cabozo (Non, non! Tranquilos que non nos vendemos a ese partido político que todos estades a pensar… ), que agora só se poida acceder á web mediante convite, non só non ten porque ir en contra do desenvolvemento futuro de Cabozo, como algúns poden pensar, senón que debería servir como un elemento dinamizador da actividade dos actuais e futuros usuarios, e polo tanto da verdadeira razón de ser deste tipo de webs: a participación.

Con esta medida podemos, por un lado, minimizar o máximo posible o rexistro masivo de usuarios (normalmente motivados por marabillosas publicacións na prensa sobre Cabozo canto sensacionalismo mimá!) que chegan “por botar unha ollada” e sen tempo nin ganas para coñecer o que realmente lles pode ofrecer a web, desaparecen para sempre. O problema deste tipo de rexistros xa non é que non acheguen nada ao proxecto, senón que por descoñecemento, poden chegar a dar unha imaxe irreal e negativa do que verdadeiramente é Cabozo.

Queremos que a maioría dos futuros usuarios cheguen a Cabozo por algún tipo de vínculo con usuarios da web (amizade, “colegueo”, proximidade…)

Por outro lado cremos que adoptando esta medida convertemos os nosos usuarios, aínda máis, nos verdadeiros xuíces do futuro de Cabozo. Agora só eles teñen o poder de decidir se queren que isto siga crecendo, invitando a xente comprometida e que participe activamente na web, ou non, invitando a usuarios sen ningún vínculo ou interese na web ou, simplemente, non invitando (recomendando) a web a ninguén.

Que che parece que na web hai moitos usuarios que falan alemán e son pro iPhone e a ti gustaríache que houbese máis usuarios que falasen inglés e fosen pro Android? Agora está nas túas mans! Ti decides quen entra en Cabozo!

Probablemente os que máis beneficiados saen de todo isto son os nosos Superusuarios ou usuarios máis activos, que agora teñen nas súas mans a capacidade real de decidir que vai pasar con Cabozo. Eles son a verdadeira esperanza deste proxecto e do uso que fagan durante os próximos meses dos seus novos “poderes” (os convites) dependerá en boa medida o futuro de Cabozo.

Con iso non queremos criticar os usuarios pasivos, que sempre serán necesarios en certa medida, para que os activos sexan o que son Difícilmente os usuarios activos poderíanse realizar sen pasivos…

Como enviar convites?

Xa podes enviar convites dende a opción “Usuarios de Cabozo“. Unha vez dentro atoparedes a ferramenta que permite enviar convites vía correo electrónico (pica para ver sobre a imaxe anterior). Cada usuario dispón de 5 convites.

E TI QUE OPINAS DE TODO ISTO? O principio do fin ou a fin dunha etapa?